Жүйе технигі

Жүйе технигі - бұл компьютерлік желі құрылымының тұтастығын қолдауға, оның сегменттеріне қызмет көрсетуге, әр жеке компьютерге қызмет көрсетуге және оны жөндеуге жауапты маман. Аппараттық және бағдарламалық қамтамасыз етуге техникалық қызмет көрсетуді, жөндеуді, тестілік тексеруді жүзеге асырады.

Жүйе технигінің міндетіне компьютерлік жабдықтарға қызмет көрсету, техникалық жай-күйін анықтау, параметрлерін тексеру, операциялық жүйені, басқа да бағдарламалық компоненттерді орнату, істен шыққан бөлшектерді жөндеу жатады. Осы біліктілік бойынша ойдағыдай білім алу үшін студенттің физика, информатика саласында білімі болуы тиіс.

Еңбекақысы жұмыс орнына, біліктілік деңгейі мен тәжірибесіне байланысты болады. Орта есеппен алғанда жас маманның жалақысы 100-120 мың теңгені құрайды.

Жоғары деңгейдегі маман болу үшін минималды тәжірибе - 3 жыл. Бұл мамандықта тәжірибенің болуы өте маңызды.

Бұл маманның бойында мынадай бірқатар жеке қасиеттер болуы қажет: ұқыптылық, зейінділік, мақсаттылық, өз бетінше шешім қабылдай алуу қабілеті, жауапкершілік, коммуникабельділік, сондай-ақ логикалық ойлау, есте сақтау қабілетінің жоғары деңгейі.

Саланың ерекшелігі мынада - бұл жерде практикалық дағдылар бағаланады, алайда жас мамандар белгілі бір міндеттерді орындау барысында қандай да бір қиындықтарға тап болуы мүмкін. Еңбек нарығында сұранысқа ие мамандардың қатарында болу үшін үнемі өзінің іскерлігі мен дағдыларын жетілдіріп отыру қажет.

Бұл мамандықтың кемшілігі - кәсіптік аурулардың пайда болуы мүмкіндігінде. Жұмыс істеу қалпы - отырып жұмыс істеу, сондықтан арқа мен мойынның ауырсынуына әкеп соғатын кәсіби аурулар пайда болуы мүмкін.

Бұл мамандық еңбек нарығында сұранысқа ие, өйткені ақпараттық технологиялар өміріміздің барлық саласына мықтап енді. Бұл бейіннің мамандары әр кәсіпорында қажет.